Fast vorbei

Jæja, þá er þessum hrímkenndu, slímkenndu og dvergkenndu prófum að ljúka. Eftir fjandans tvær vikur af óhefðluðu sykuráti og próflestri hefði ég átt að sleppa frá þessari pyntingu í gær, en nei, ég þarf að fara í sjúkrapróf. Dæmigert. Mér tekst alltaf að koma málunum þannig fyrir að ég þurfi að að fara í próf á jólaballsdegi. Urrrrr.

Það stoðar þó ekkert að kjökra eins og bæverzkt stúlkubarn sem hefur týnt Pretzlinu sína. Ú, talandi um Pretzel, sem eins og lesendur eflaust vita ( eins gott, Adolf hefur ímigust á fólki sem kann ekki góð skil á þýskri matargerð) er þýskt bakkelsi. Löngun mín í þýskan mat er óseðjandi um þessar mundir. Íslenskur matur er mjög góður, en af hverju er ekki hægt að fá almennilegan Döner og Currywurst á Fróni? Heitt, safaríkt Kebab með mikilli tzatziki sósu og chilli kryddi. Og fituga Currywurst með mæjónesi og frönskum kartöflum. Ég viðurkenni fúslega að þessi matur er eflaust heilsuspillandi og sérstaklega þeggar Currywurst er snætt í félagsskap franskra kartaflna, hverjum hefur verið drekkt í mæjónesi. En mér er sama. Þetta lostæti bragðast svo vel að ég skal fúslega vera tengdur við fitusogstæki það sem eftir er ef það gerir mér kleift að borða það.!!

Ekki það að ég þurfi þýskan mat til að klína kólestrólsulli á æðaveggi mína. Nóg verður sukkað með íslenskri matargerð um jólin.

Núna þarf maður víst að taka um reikningsbækur og læra þessa satanísku stærðfræði. Vonandi getur hann félagi minn, Bob Marley, hjálpað mér í gegnum þetta. Þ.e.a.s. ef ég má ennþá hlusta á hann. Ætli Jón Magnússon og félagar hans í Íslenska klaninu ( æ, fyrirgefið, Frjálslynda flokknum) hafi ekki bannað tónlist hans ásamt öllu því sem tengist fólki sem er ekki komið af Agli Skalla-Grímssyni í beinan ættlegg.?

tata.